Захирал Э.Энхтайван
Хятад Монголын хамтарсан олон улсын дээд сургууль нь 2017 онд БНХАУ-ын ӨМӨЗО-ны Санхүү, эдийн засгийн их сургууль, Монгол улсын Санхүү, эдийн засгийн их сургууль, Монгол Бизнес дээд сургуулиудын үүсэл санаачилгаар байгуулагдсан боловсрол сургалтын байгууллага юм.
Сүүлийн жилүүдэд Монгол-Хятадын харилцаа асар эрчимтэй өргөжиж байгаа ч боловсрол, эрүүл мэндийн салбарт өнөөгийн эрэлт хэрэгцээг хангаж чадахгүй байна. Өнөөдрийн байдлаар зөвхөн БНСАУ-ын хөрөнгө оруулалттай 3 их, дээд сургууль, 5 томоохон эмнэлэг, Япон, Англи, АНУ- ын хөрөнгө оруулалттай 3 сургууль байгуулагдлаа. Гэтэл эдийн засгийн хамгийн өргөн харилцаатай БНХАУ- ын хөтөлбөрөөр хичээллэдэг ганц ч дээд сургууль байхгүй байгаа нь ялангуяа дээд боловсролын чиглэлээр хамтарч ажиллах шинэ эрэлт хэрэгцээг буй болгож байна.
2016 оны 6 дугаар сард Узбекистаны нийслэл Ташкент хотноо Монгол, Хятад, Оросын төрийн тэргүүнүүдийн гурав дахь удаагийн дээд хэмжээний уулзалтаар “Эдийн засгийн коридор” байгуулах хөтөлбөрийг баталсан. Энэхүү хөтөлбөрийг амжилттай хэрэгжүүлэхэд тус гурван улсыг холбосон “Эдийн засгийн коридор”-т ажиллах чадвартай, хятад, орос, монгол хэлтэй, мэргэжлийн өндөр чадвартай боловсон хүчнийг зорилго, чиглэлтэйгээр бэлтгэх асуудал хамгийн чухал хэсэг юм.
Манай сургуулийн бүх хөтөлбөрүүд 3+1 хэлбэрээр хэрэгжих боломжтой. Өөрөөр хэлбэл 1 жил нь БНХАУ-ын ӨМӨЗО-ны Санхүү эдийн засгийн их сургуульд Монголын нөхцөлөөр суралцана гэсэн үг. Ингэснээр оюутнууд төгсөхдөө БНХАУ-ын ӨМӨЗО-ны Санхүү эдийн засгийн их сургуулийн хос дипломтой төгсдөг. Түүнчлэн 4-р курсдээ орос хэлийг судлах, сүүлийн үеийн програм хангамж дээр дадлага хийх зэргээр эрхэм зорилгодоо чиглэсэн сургалтуудыг явуулдаг.
2017-2018 оны хичээлийн жилээс эхлэн Боловсролын 5 талт зарчмыг сургалтдаа бүрэн нэвтрүүлэн ажиллаж байна. Энэхүү зарчмын хүрээнд Багш зөвхөн заасан хичээлийнхээ хүрээнд оюутныг дүгнэдэг тогтgолцоог өөрчилж, дээд боловсрол эзэмшин төгсөн гарч байгаа оюутан нь Оюуны чадамж, Сэтгэлийн тэнхээтэй, Өөрийгөө удирдах болон Бусадтай харилцах чадвар эзэмшсэн, Эрүүл амьдрах төлөвшилт, бие бялдрын хөгжилдөө анхаардаг хэвшилтэй болсон байх зарчмыг баримталж байна.
Номын цагаан буян дэлгэрэх болтугай.