Хятад Монголын хамтарсан олон улсын дээд сургуулийг БНХАУ-ын ӨМӨЗО-ны Санхүү, эдийн засгийн их сургууль, Монгол улсын Санхүү, эдийн засгийн их сургууль, Монгол Бизнес дээд сургуулиуд 2017 оны 3 дугаар сард үүсгэн байгуулж, 2017 оны 8 дугаар сарын 17-нд Монгол улсын Боловсрол, соёл шинжлэх ухаан, спортын сайдын А/115 тоот тушаалаар сургалт эрхлэх тусгай зөвшөөрөл олгогдсон.
2016 оны 6 дугаар сард Узбекистаны нийслэл Ташкент хотноо Монгол, Хятад, Оросын төрийн тэргүүнүүдийн гурав дахь удаагийн дээд хэмжээний уулзалтаар “Эдийн засгийн коридор” байгуулах хөтөлбөрийг баталсан. Энэхүү хөтөлбөрийг амжилттай хэрэгжүүлэхэд тус гурван улсыг холбосон “Эдийн засгийн коридор”-т ажиллах чадвартай, хятад, орос, монгол хэлтэй, мэргэжлийн өндөр чадвартай боловсон хүчнийг зорилго, чиглэлтэйгээр бэлтгэх асуудал хамгийн чухал хэсэг гэж гурван сургууль үзэн хамтарсан сургуулийг үүсгэн байгуулсан болно.
ЭРХЭМ ЗОРИЛГО
Бүх талын цогц боловсролтой, хөрвөх чадвартай мэргэжилтнийг дэлхийн жишигт бэлтгэдэг сургалт-эрдэм шинжилгээний байгууллага болох
АЛСЫН ХАРАА
Олон улсад хүлээн зөвшөөрөгдсөн Монгол үндэстний их сургууль болох
ҮНЭТ ЗҮЙЛС
Боловсролын 5 талт зарчим
Оюунлаг, бүтээлч хамт олон
Хамтын ажиллагаа
Тус сургууль нь Нягтлан бодох бүртгэл, бизнесийн удирдлага, банк санхүү, маркетинг, менежментийн хөтөлбөрүүдээр Бизнесийн удирдлагын бакалаврын зэрэг олгох 4 жилийн үндсэн, 2,5 жилийн орой, эчнээ сургалт, Нягтлан бодох бүртгэл, бизнесийн удирдлагын хөтөлбөрүүдээр Бизнесийн удирдлагын магистрын зэрэг олгох 1,5 жилийн сургалтуудыг эрхлэн явуулдаг. Түүнчлэн Олон улсын хууль, эрхзүй, аялал жуулчлал, хятад хэлний орчуулагчийн чиглэлээр мэргэжилтэн бэлтгэх хөтөлбөрөө боловсруулан бэлтгэл ажлаа хангаад байна.
Бизнесийн удирдлагын бакалаврын зэрэг олгох 4 жилийн үндсэн ангийн оюутнууд нь 3+1 зарчмаар суралцах бөгөөд 1 жил нь БНХАУ-ын ӨМӨЗО-ны Санхүү эдийн засгийн их сургуульд Монголын нөхцөлөөр суралцана. Хятад Монголын хамтарсан олон улсын дээд сургууль нь БНХАУ-ын ӨМӨЗО-ны Санхүү эдийн засгийн их сургуультай харилцан кредит хүлээн зөвшөөрөх гэрээтэй тул оюутнууд хос дипломтой төгсдөг.
3+1 хөтөлбөрт БНХАУ-ын ӨМӨЗО-ны Санхүү эдийн засгийн их сургуулийн оюутнууд мөн хамрагддаг бөгөөд нэг хичээлийн жилд 30 хүртэл оюутан тус сургуульд холбогдох мэргэжлээрээ суралцдаг. Эдгээр оюутнуудад үндсэн хөтөлбөрөөс гадна Монгол улсын хууль, журам, зан заншил, соёлын холбогдолтой хичээлүүд заахаас гадна гааль, татвар зэрэг холбогдох төрийн захиргааны байгууллагууд дээр дадлага хийлгэдэг.
Бизнесийн удирдлагын магистрын зэрэг олгох сургалт нь 1+1 хэлбэрээр явагддаг. Тус хөтөлбөрт хамрагдсан оюутнууд нь мөн хос дипломтой төгсдөг бөгөөд БНХАУ-ын ӨМӨЗО-ны Санхүү эдийн засгийн их сургуульд Монголын нөхцөлөөр суралцана.2017-2018 оны хичээлийн жилд тус сургуулийн 5 багш тус хөтөлбөрт хамрагдаад байна.
Боловсролын зэрэг олгох сургалтаас гадна Хятад хэлний анхан, дунд шатны сургалтууд, статистикийн SPSS, Eviews програмын сургалт, Нягтлан бодох бүртгэлийн дадлагын болон програмын сургалтууд тусгай хөтөлбөрийн дагуу зохион байгуулагддаг.